ஞாயிறு போற்றுபவர்கள்

மடித்துக்கட்டிய லுங்கியுடனோ
பூப்போட்ட டவுசர் உடனோ
கறிக்கடையில் நிற்கிறீர்கள் நீங்கள்.
பாரதியின் மீசை வரைந்த டீ சர்ட்டுடன் 
நெஞ்சு பொறுக்குதில்லையே என 
இலக்கியம் பேசத்துவங்குகிறார்கள் அவர்கள். 

எல் ஈ டி பெருந்திரையில்
இந்தியாவும் இலங்கையும் எதிர்கொள்வதை
நேரலையில் காண சிப்ஸ் பாக்கெட்டுகளுடன்
காணத் தயாராகிறீர்கள் நீங்கள்.
இன அழிப்புக்கு எதிராக
தொண்டைத் தண்ணீர் வற்ற
நாற்சந்தியில் தோழர்களுடன் கத்திக்கொண்டிருக்கிறார்கள் அவர்கள். 

குடும்பத்துடன் பொட்டலச் சாப்பாடுகளுடன்
உங்கள் வாகனத்தில்
மலைவாசஸ்தலத்துக்குக் கிளம்புகிறீர்கள்
அங்கும் அவர்கள் நெகிழிப்பைகளைப்
பொறுக்கி தூய்மைப்படுத்த
சூழலியல் வாசகங்கள் தாங்கிய பதாகைகளுடன்
காத்திருக்கிறார்கள். 

மென் விளக்கொளியில் உங்கள் தோழிகளுடன்
கோப்பைத் திரவம் சிந்தா லாவகத்துடன்
மேற்கத்திய இசைக்கு உருகி நடனமாடுகிறீர்கள்.
பறையைத் தோளில் மாட்டிக்கொண்டு
அதிர அதிர இசைத்தபடி
பிரச்சாரத்திலிருக்கிறார்கள் அவர்கள்
.
உங்கள் ஞாயிற்றுக்கிழமைகள் அவர்களுக்கில்லை
உங்கள் வாழ்வும்